حد فكر يقرأ التوراه

حد فكر يقرأ التوراه .. طبعا لأ .. و هنقراها ليه يعنى .. نقراها علشان فيها بلاوى متلتله .. و احنا زى الخايبين مضيعين و قتنا و جهدنا فى تحسين صوره الاسلام و الرد على الشبهات الى المفروض انها تسئ الى الاسلام ..

والله ده شئ عجيب اوى .. هى الناس دى ماقرتش الكتاب المقدس بتاعهم قبل ما تتكلم .. ده انا لو مكانهم كنت ضربت نفسى بالرصاص او شفتلى اى حته ادفن نفسى فيها من كتر كسوفى و خجلى من الحاجات الى مذكوره فى كتاب المفروض انه مقدس .. مش اجى على اطهر و اقدس كتاب فى الارض و افترى عليه .. بس نقول ايه .. الناس دى عارفه اننا شعوب جاهله و سهل جدا استدراجنا ..

دول المفروض يحمدوا ربنا و يبوسوا ايديهم وش و ضهر ان القرآن الكريم ده موجود علشان ينصف الانبياء و يذكر قصصهم الحقيقية الطاهره بعيدا عن النجسات الى ذكروها عن كل الانبياء بدون استثناء ..

تخيل معايا يا مؤمن ان كل الانبياء فى التوراه “المفتراه” بيسكروا و يزنوا و ينصبوا و يسرقوا .. لا و خد التقيله بيعبدوا الاصنام  .. اعوذ بالله و حاشا لله  ان الانبياء المطهرين يكونوا كده ..

بصراحه لازم كلنا نقرا التوراه علشان الى يفتح بوءه معانا نحطها فى عينه و نعرفه مقامه .. دا احنا راقيين اوى يا جدعان و القرآن ده نعمه رهيبه و احنا مش حاسين .. انا كنت زى الاموره بقول احترام الاديان و الحوار وتقبل الآخر و كلها ديانات سماويه من عند ربنا .. بس فعلا هى مش كده .. هات اى عقل سليم و قوله ان النبى الفلانى نام مع بناته و خلف منهم و هو سكران .. او نبى آخر بيزنى مع ست متجوزه و يقتل جوزها الى هو قائد فى الجيش عنده .. و نبى تالت فضل يشرب لحد ما سكر طينه و قلع ملط .. و نبى آخر عمل عمليه نصب و احتيال علشان ياخد اغنام بتاعه عمه الى كان بيشتغل عنده ..

انا اسفه بصراحه على الالفاظ و الوصف البشع بس الكلام ده و انيل منه الف مره مذكور فى الكتاب “المتفبرك” الى اسمه العهد القديم او التوراه و حاشا لله ان تكون هذه هى التوراه التى انزلها ربنا سبحانه و تعالى على سيدنا موسى عليه السلام .. بجد بجد هما فين و احنا فين .. الحمدلله على نعمه الاسلام .. بس السؤال الى محيرنى فعلا ازاى الناس دى مؤمنه بالكلام البشع ده .. مش فاهمه

مشاعر

مشاعر غريبة اوى .. يا ترى هل كل انسان مكتوب عليه انه يحس بكل المشاعر الى فى الكون يعنى الحب و الكره .. السعادة و التعاسة .. الفرح و الحزن .. طب و المشاعر السيئة اوى زى الحقد و الغل و الحسد هل لازم يحس بيهم فى وقت من الاوقات ؟؟

افتكر زمان لما كنت اشوف حد مش قادر يستمتع بجمال الحياة و الاشياء الصغيرة بتضايقه و بتحرمه من انه يشوف الاشياء الكتير الجميلة الى حواليه و اقول هو ليه فلان ده كده نكدى و متشائم .. لكن مع الوقت لقيت انى انا كمان بقيت بتحول لنفس الشئ .. حاجات صغيرة فى الحياة بتضايقنى و تعكنن عليا و احاول اخرج نفسى من المود مش بعرف يعنى غصب عنى مش بأيدى.

كمان لما كنت اشوف حاجة مش معمولة باتقان اقول ايه ده .. ايه العك ده انا لو مكان الناس ديه ماكنتش سمحت لحد يلخبط الدنيا كده و كنت جبت ناس متخصصة تعمل الشغل .. لكن لما اتحطيت فى المكان ده الناس عكت اكتر من الاول ولا عرفت اعمل حاجة.

يا ترى انا كنت مغرورة و فاكرة نفسى بفهم فى كل حاجة و بعرف استمتع بالحياة و الدنيا ربيع و الجو بديع و لما اتحطيت مكان كل انسان لقتنى بتصرف زيه .. ولا ده ابتلاء من ربنا ولا عقاب على ذنوب عملتها و انا صغيرة .. الحقيقة مش عارفة بس الى انا عارفاه ان منحنى النجاح فى حياتى واقف مش بيتحرك ..

و ده بيخلينى اقف اكتر و مايبقاش نفسى اعمل حاجة ما كل حاجة واقفة و مقفلة .. يا ترى انا الى مكبرة حاجات تافهه ولا دى اشارات من ربنا لازم اقف عندها و افكر ولا بلاش افكر و اسيبها كده على ربنا و زى ماتيجى تيجى ..

سن ال 24

اجمل سن هو سن ال 24 بتكون فيه فى اجمل و احسن حالاتك .. بمعنى ان صحتك بتبقى حلوة و تمام .. مش زى لما كنت صغير و ضعيف او بتربى عضلات و بتكون خلاص دقنك و شنبك طلعوا و بقى شكلهم حلو .. و فى نفس الوقت بيكون لسه بدرى عليك من الشكاوى بتاعة ضهرى و جعنى من الشغل و رقبتى مش عارف ايه و ركبتى لخلخت و عينيه زغللت و الكلام الى بيحس بيه الناس بعد الثلاثين من كتر الشغل و قله الرياضه و الحركة ..

و نفس الشئ بالنسبة للبنت بيكون السن ده اجمل سن ليها .. يعنى بتكون بقت انثى مكتمله .. مش عبيطة و هطله زى ايام ثانوى او مرووشه و مجنونة زى ايام الجامعه .. لا بتبقى حاجه كده وسط و روقان ..

كمان على مستوى الشخصية .. العمر ده بتكون الشخصية اتكونت بشكل جميل اوى .. يعنى حماس و علم و ثقافه و رغبه فى التقدم و اثبات الذات .. لكن مع شوية خبرة صغيرين يخلوا الواحد عاقل الى حد ما .. لأن خد بالك ان كل ما الخبرة زادت كل ما الحماس قل لأنك بتبقى حريص جدا فى كل تصرفاتك و ده بيضيع كتير من متعة المغامرة و الامل فى المستقبل ..

فى سن ال 24 بيبقى الولد عايز يثبت نفسه فى شغله و يبقى حاجه مهمه و البنت بتكون عايزة نفس الشئ بس كمان بيبقى نفسها تتجوز و تكون اسرة و بيكون عندها احلام و امال رومانسية كتير اوى .. و بتكون مستعده للتضحيه و الكفاح علشان الى بتحبه .. ده طبعا لما يكون فيه منه رجا .. مش قاعد جنب ماما و عايز يشتغل مدير يا اما بلاش ..

فى سن ال 24 بتكون الحياه حلوه و الامل كبير و المشاعر دافيه .. بس يا ترى بنقدر نعمل ايه فى السن دى ؟؟؟

البنت علشان تتجوز فى السن دى يا دوب تاخد واحد اكبر منها بعشره اتناشر سنة و على فكره هيكون برضه لسه بيكون نفسه يعنى مش امله ولا حاجه .. يا اما تخليها فى شغلها و مستقبلها المهنى و ده بيحقق لها استقلال مادى و راحه نفسية بس فى مقابل انها بتفتقد الزوج و الاولاد.

و الولد لو حظه حلو هتجيله سفريه لأى دوله عربيه او اجنبيه .. يشتغل و يتغرب اد سبع تمن سنين على يا دوب ما يقدر يقول يا جواز و لو حب يرجع بلده مايلاقيش الشغلانه الى تعيشه فى مستوى كويس فيفضل بره على طول .. اما لو فضل فى مصر مش عارفه بصراحه هيعمل ايه فى الغلى و الكوى الى احنا فيه ..

و فى ظل كل ده مشاعرنا بتروح فين و شبابنا و صحتنا و عمرنا الجميل .. و جمالنا .. و براءة النظرة فى عينينا .. و احساسنا بالأمان و الامل ..

بس هنقول ايه .. لآ اله الا الله .. يعنى هو ربنا مش شايف و عارف كل حاجه .. و الى خلقنا مش ممكن ينسانا ابدا .. المهم احنا الى ماننساش .. و نثق فيما عند الله .. و نثق ايضا ان الرزق مقدر تماما .. يعنى مهما حصل و هيحصل مش ممكن ابدا يوصل لنا الا رزقنا المقدر لنا .. مهما كانت مخاوفنا و مهما كانت ايامنا .. يا رب الفرج من عندك و الشكر لك و الحمدلك.

انا و انا

نفسى احب و الاقى حد يحبنى و يخاف عليه ..

يا سلام طب ما كل الناس نفسها زيك كده ايه الجديد؟

طيب احب ازاى مانا لو سمحت لحد يدخل حياتى و يقولى كلمتين حلوين من قبيل ايه القمر ده و وحشتينى الخ الخ حتى لو من قلبه يبقى ربنا مش هيبارك لأنى كده بفتح باب للشيطان ..

حد قالك تفتحى خليكى قافله .. ابقى افتحى بعد الجواز ..

ايوه الله ينور عليك بعد الجواز .. طب و انا ايه ضمنى انى هحب جوزى بعد ما اتجوزه مش يمكن ماحبوش ؟

يابنتى ما توجعيش دماغى انتى عايزة ايه؟ ..

مش عايزة حاجة انا مبسوطه كد و انا قافله بس اهو بفكر بصوت عالى ..

ما تشيليش هم .. ربنا سبحانه و تعالى هو المدبر لكل شئ .. عيشى بس يومك صح و سيبى بكره على الى خلقه .. انا عارف انك انسانه و ليكى مشاعر زى كل الناس و احيانا المشاعر هى الى بتتكلم .. بس دايما دايما خليكى فاكره ربنا و احمديه على كل شئ ..

الحمد لله و الشكر لله .

شيله و حطه

الحياة بقت ممله .. او هيا اصلا ممله مش عارفه .. ايه الحكمة من ان لازم يكون فيه حاجه فى الحياه تخنقك .. شئ او شخص .. و العجيب انك ممكن اوى تكون فى حالك خالص و مش بتأذى حد و مش بتضايق حد و لا بتجر شكل حد .. بس هو كده غتاته و خلاص .. المضايقات تجيلك لحد عقر دارك يا جدع و بدون اى مناسبة ..

بس العجيب فى الموضوع ان برضه السعادة و الفرح بيجولك لحد عقر دارك من غير ما تنتظرهم و لا تعمل حسابهم .. حياه عجيبة و متعبة عامله زى القطر الافعوانى بتاع الملاهى يوم تشيلك و تطلعك فوووق و يوم تهبدك على ملا وشك .. و يوم تقعد تهز فيك و تبقى روحك هتطلع و مش عارف لك سما من ارض.

قدامك حاجة من اتنين يا تاخد على كده و تعرف ان ده العادى و فى الحاله دى هتصاب بشى من تبلد الاحساس يا تتعب و تدوب من كتر الشيل و الحط و تحس انك بجد تعبت بقى و مش حمل بهدله اكتر من كده.

العلم و سنينه

هيجيلى شلل فى نافوخى .. بعد الشر بعد الشر .. بس بجد مش عارفة اظبط الدنيا .. اختراع كده اسمه css ده بيستعمل فى تنفيذ صفحات المواقع دلوقت .. زمان كنا بنشتغل tables و اقلب التصميم يا معلم .. دلوقت روحى طلعت علشان اواكب العصر الحديث و برضه مش مرتاحه ..

المهم ده كلام تقنى مش هيفهمه الا ولاد الكار .. بس الحقيقة هو مدخل للموضوع الى عايزه اطرحه .. انا اتعلمت تصميم المواقع مع نفسى يعنى من الكتب و النت و دراسة المواقع الكبيرة و الحمدلله النت مصدر مفتوح يعنى تقدر تعرف اى موقع فى الدنيا معمول ازاى و تعمل زيه ..

طب دى حاجه فله اوى ايه المشكلة بقى .. المشكلة يا سيدى انك بتتعلم بالمشقلب يعنى مثلا انت عايز تعمل عربية تقوم تجيب عربية جاهزة و تفكها حتت .. و تقعد تدرس كل حته معموله ازاى و وظيفتها ايه و بتتركب على اختها ازاى و لا يخفى على ذكاءك طبعا انها مش هتشتغل من اول مرة و لا حتى عاشر مرة و هتقابلك مشاكل كتيييييير تقعد تدور على حل لكل مشكلة .. و بعدين تبص تلاقى انك جيت تقصر البنطلون الجاكتة ضربت على رأى سمير غانم.

و كل ده ليه علشان مافيش منهج ومافيش مكان محترم تتعلم فيه ومافيش تدريب فى الشركات و مهما حاولت تذاكر مع نفسك و تقرأ كتب و تدور على النت برضة مش هتلاقى الزبد يا معلم .. لابد من فك العربية .. واحد طيب و ابن حلال يقولى ليه ماهو فيه اماكن بتعلم الويب ديزين اقوله .. فعلا فيه بس حاجات بيزيك اوى اساسيات يعنى و برضه من ايام تحتمس ..

انا بس الى قاهرنى ان الواحد بعد ما داق المر و سهر الليالى علشان يعرف يعمل العربية و بقى اسطى بريمو اد الدنيا .. ولاد الايه غيروا التكنيك خالص و رجعنا الى نقطة البداية .. بجد حاجة تفرس يعنى احنا عمالين نجرى علشان بس نلحق التكنولوجيا و نتعلمها و الشباب فى البلاد المتقدمة عماله تخترع و تحدث فى كل شئ .. بجد بجد احنا عايزين نتعلم نتعلم نتعلم .. ناقصنا علم يا ناس.