سن ال 24

Posted: أبريل 6, 2008 in افكار
الوسوم:

اجمل سن هو سن ال 24 بتكون فيه فى اجمل و احسن حالاتك .. بمعنى ان صحتك بتبقى حلوة و تمام .. مش زى لما كنت صغير و ضعيف او بتربى عضلات و بتكون خلاص دقنك و شنبك طلعوا و بقى شكلهم حلو .. و فى نفس الوقت بيكون لسه بدرى عليك من الشكاوى بتاعة ضهرى و جعنى من الشغل و رقبتى مش عارف ايه و ركبتى لخلخت و عينيه زغللت و الكلام الى بيحس بيه الناس بعد الثلاثين من كتر الشغل و قله الرياضه و الحركة ..

و نفس الشئ بالنسبة للبنت بيكون السن ده اجمل سن ليها .. يعنى بتكون بقت انثى مكتمله .. مش عبيطة و هطله زى ايام ثانوى او مرووشه و مجنونة زى ايام الجامعه .. لا بتبقى حاجه كده وسط و روقان ..

كمان على مستوى الشخصية .. العمر ده بتكون الشخصية اتكونت بشكل جميل اوى .. يعنى حماس و علم و ثقافه و رغبه فى التقدم و اثبات الذات .. لكن مع شوية خبرة صغيرين يخلوا الواحد عاقل الى حد ما .. لأن خد بالك ان كل ما الخبرة زادت كل ما الحماس قل لأنك بتبقى حريص جدا فى كل تصرفاتك و ده بيضيع كتير من متعة المغامرة و الامل فى المستقبل ..

فى سن ال 24 بيبقى الولد عايز يثبت نفسه فى شغله و يبقى حاجه مهمه و البنت بتكون عايزة نفس الشئ بس كمان بيبقى نفسها تتجوز و تكون اسرة و بيكون عندها احلام و امال رومانسية كتير اوى .. و بتكون مستعده للتضحيه و الكفاح علشان الى بتحبه .. ده طبعا لما يكون فيه منه رجا .. مش قاعد جنب ماما و عايز يشتغل مدير يا اما بلاش ..

فى سن ال 24 بتكون الحياه حلوه و الامل كبير و المشاعر دافيه .. بس يا ترى بنقدر نعمل ايه فى السن دى ؟؟؟

البنت علشان تتجوز فى السن دى يا دوب تاخد واحد اكبر منها بعشره اتناشر سنة و على فكره هيكون برضه لسه بيكون نفسه يعنى مش امله ولا حاجه .. يا اما تخليها فى شغلها و مستقبلها المهنى و ده بيحقق لها استقلال مادى و راحه نفسية بس فى مقابل انها بتفتقد الزوج و الاولاد.

و الولد لو حظه حلو هتجيله سفريه لأى دوله عربيه او اجنبيه .. يشتغل و يتغرب اد سبع تمن سنين على يا دوب ما يقدر يقول يا جواز و لو حب يرجع بلده مايلاقيش الشغلانه الى تعيشه فى مستوى كويس فيفضل بره على طول .. اما لو فضل فى مصر مش عارفه بصراحه هيعمل ايه فى الغلى و الكوى الى احنا فيه ..

و فى ظل كل ده مشاعرنا بتروح فين و شبابنا و صحتنا و عمرنا الجميل .. و جمالنا .. و براءة النظرة فى عينينا .. و احساسنا بالأمان و الامل .. بس هنقول ايه .. لآ اله الا الله .. يعنى هو ربنا مش شايف و عارف كل حاجه .. و الى خلقنا مش ممكن ينسانا ابدا .. المهم احنا الى ماننساش .. و نثق فيما عند الله .. و نثق ايضا ان الرزق مقدر تماما .. يعنى مهما حصل و هيحصل مش ممكن ابدا يوصل لنا الا رزقنا المقدر لنا .. مهما كانت مخاوفنا و مهما كانت ايامنا .. يا رب الفرج من عندك و الشكر لك و الحمدلك.

Advertisements
تعليقات
  1. انتي عندك حق في كل كلامك
    بس اشمعنى الاربعة وعشرين بالذات يعني؟
    المواصفات اللي قلتيها دي بتصاحب الانسان فترة من عمره واللي هي غالبا من بعد العشرين

  2. على فكرة انا عندي 24 سنة بالظبط D:

  3. koko كتب:

    الام و امال

    كل سنة و انت طيب .. ال 24 بتكون بدأت حياتك العملية و عندك شوية خبرة و احتكاك صغيرين .. انا اقصد ان السن ده هو سن بداية المشوار .. قبل كده بتكون فى دنيا تانية .. الكلية و المذاكرة و الاصحاب و الترويش .. و بعد كده بكام سنة بتكون شايل هموم و مسؤليات كتير ماكنتش تفكر فيها قبل كده ..

  4. Soooo كتب:

    انا شامم تخبيط في سن التلاتين
    لا يا هانم
    مش اي تلاتيني يبقى ضهره اتعوج واتكسح وباظ وبقى اكس باير
    انا صحيح شعري وقع
    كرشي كبر
    نظري ضعف
    مش باقدر امشي كتير
    بانام على روحي في الشارع
    لكن الحمدلله ذاكرتي فولاذيه

    هو انا فين؟؟؟؟

    كل سنه وانتي طيبه ياكوكو وعقبال اليوبيل الذهبي

    سلاموووووووووووووووووز

  5. أمممممممممممم
    تصدقى؟؟

    مش فاكرة كنت عاملة ازاى فى الـ24 دة

    ياااااااة
    ليت الشوباب يعوديوما
    ليرى ما فعل بنا الثلاثينوووووووو

    خخخخخخخخخخخخ

  6. koko كتب:

    سوووو
    شربات يا سوووو … هو انت فيه حد زيك يا باشا .. ثلاثين اربعين خمسين الرك على الحشو .. على فكرة انا ماعنديش 24 سنة انا اكبر بكام شهر بس مش هقول كام .. يمكن 10 شهور يمكن عشرين او اكتر ..

    شهروزة
    منورة يا قمر و على رأيك خخخخخخخخخخخ 🙂

  7. ahmed كتب:

    ال 23 و ال 24 وال 25 من أحلي السنين

    هو مفيش جديد ليه ؟؟ .. بقالك شهر ما كتبتيش تدوينات جديدة يا كوكو

  8. koko كتب:

    احمد
    معلش الدنيا معانده معايا شويه .. حاسه انى ماليش نفس لحاجه .. كل ما اتحمس و ابذل مجهود فى شئ تكون النتيجة مش حلوه خالص .. ربنا يفرجها من عنده و يسهل الحال .. شكرا لاهتمامك و سؤالك

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s