مشاعر

Posted: مايو 2, 2008 in مشاعر

مشاعر غريبة اوى .. يا ترى هل كل انسان مكتوب عليه انه يحس بكل المشاعر الى فى الكون يعنى الحب و الكره .. السعادة و التعاسة .. الفرح و الحزن .. طب و المشاعر السيئة اوى زى الحقد و الغل و الحسد هل لازم يحس بيهم فى وقت من الاوقات ؟؟

افتكر زمان لما كنت اشوف حد مش قادر يستمتع بجمال الحياة و الاشياء الصغيرة بتضايقه و بتحرمه من انه يشوف الاشياء الكتير الجميلة الى حواليه و اقول هو ليه فلان ده كده نكدى و متشائم .. لكن مع الوقت لقيت انى انا كمان بقيت بتحول لنفس الشئ .. حاجات صغيرة فى الحياة بتضايقنى و تعكنن عليا و احاول اخرج نفسى من المود مش بعرف يعنى غصب عنى مش بأيدى.

كمان لما كنت اشوف حاجة مش معمولة باتقان اقول ايه ده .. ايه العك ده انا لو مكان الناس ديه ماكنتش سمحت لحد يلخبط الدنيا كده و كنت جبت ناس متخصصة تعمل الشغل .. لكن لما اتحطيت فى المكان ده الناس عكت اكتر من الاول ولا عرفت اعمل حاجة.

يا ترى انا كنت مغرورة و فاكرة نفسى بفهم فى كل حاجة و بعرف استمتع بالحياة و الدنيا ربيع و الجو بديع و لما اتحطيت مكان كل انسان لقتنى بتصرف زيه .. ولا ده ابتلاء من ربنا ولا عقاب على ذنوب عملتها و انا صغيرة .. الحقيقة مش عارفة بس الى انا عارفاه ان منحنى النجاح فى حياتى واقف مش بيتحرك ..

و ده بيخلينى اقف اكتر و مايبقاش نفسى اعمل حاجة ما كل حاجة واقفة و مقفلة .. يا ترى انا الى مكبرة حاجات تافهه ولا دى اشارات من ربنا لازم اقف عندها و افكر ولا بلاش افكر و اسيبها كده على ربنا و زى ماتيجى تيجى ..

Advertisements
تعليقات
  1. Marvel كتب:

    الفشل في شيء ما بيجيب احباط..والاحباط بيولد غضب والغضب طاقة يجب استثمارها في الاتجاه الصحيح

    اهم حاجة انك عارفة ان مكن تحققي نتائج اكبر من اللي اتحققت لحد دلوقتي..وهو ده اللي هيوجهك للاتجاه اللي عاوزاه

    فكري وشوفي ايه الغلط و حاولي تصلحيه.. وزي ما بيتقال “اعقلها و توكل”

  2. koko كتب:

    شوف يا مارفل يا صديقى .. المشكلة عندى و انا عارفاها .. انا من النوع الى بجلد نفسى .. اصعب حاجه عندى فى الدنيا هى الفشل .. بيعملى احباط و اكتئاب و بلاوى زرقه .. بس بعد فتره لما اهدى كده اقول لنفسى يا بنتى ايه العبط ده .. فيها ايه لما تغلطى .. ماهو ربنا خالقنا كائنات ناقصة و والطبيعى اننا نغلط .. نفسى ماخدش كل حاجه على صدرى كده ..

  3. Soooo كتب:

    اعذريني ياكوكو
    قريت موضوعك ده اول مره وانا كنت متلخبط فماقدرتش ارد عليكي الرد المنطقي

    اولا .. الانسان في الحياه بيكون مزدوج القطبيه .. يعني بيمر بمنعطفات لفوق ولتحت .. فطبيعي انك تيجي عليكي فتره تحسي انك منشكحه والحياه فل .. وفترات تبقي العكس ومتنكده ومش طايقه تعملي حاجه

    ثانيا .. الدنيا دي كحياه فيها مجموعة حاجات هي اللي بتعمل خبرات متنوعه .. يعني لما انتي كنتي بتشوفي زمان حاجات معموله غلط وتيجي انتي تعمليها تلاقي نفسك مش عارفه تعمليها صح .. فده طبيعي في الوقت ده .. لكن مع مرور الوقت وزيادة الاحتكاك بالحياه سواءا في المجال ده او في مجال تاني .. بتلاقي نفسك بقيتي اكثر نضج واكثر خبره لاتقان العمل

    ثالثا .. سيبيها على الله وعيشي الدنيا بحلوها ومرها وفرحها وغمها .. هي دي الدنيا

    سلاموووووووووووووووز

  4. koko كتب:

    حلوة مزدوج القطبية دى يا سوووو 🙂 .. صح انت عندك حق بس عارف ايه الى بيخنق بجد انك تبقى مجرب الحاجة و عملت اخطاء قبل كدة و اتعلمت منها و قولت خلاااااااااص المرة الجاية هاخد بالى و اعمل كل حاجة تمام .. و تيجى المرة الجاية و الدنيا كلها تتعك على دماغك ولا تعمل حاجة من الى انت قلتها ..

    عموما فعلا على رأيك خليها على الله و هى الدنيا كده فعلا .. و على مايبدو يا سوووو يا اخويا ان الانسان كائن نكدى بطبيعته .. ايه يعنى لما خسرت لى كام الف جنية طلع عينى على ما عملتهم و كل الحاجات الى كنت عايزاها اتعمل عكسها ..

    بجد و الله ده كلام فاضى .. الحمدلله على الصحة و الستر .. بتكلم جد.

  5. smraa alnil كتب:

    بطبيعتنا فينا متناقضات وازدواجية في المشاعر والتفكير

    وبتمر علينا ايام بنمر بعدة مراحل في الساعه الوحدة
    حزن وكابة وضحك ومرض وسعادة
    يعني منوعات

    المم ان في كل دة
    يبقي القلب ابيض

  6. koko كتب:

    سمراء النيل عندنا يا مرحبا يا مرحبا .. معلش انا اسفه فى التأخير على الرد .. الاسبوع عندى بيعدى كأنه يوم واحد شابك فى بعضه .. نورتى المدونه و عندك حق انا متفقة معاكى ..

  7. أهلا بيكى

    أولا وقبل أى حاجه .. البوست جميل جدا .. وواضح انه خارج من شخصيه حساسه وبتعرف تختار كلامها كويس .

    أما عن البوست .. من طبائع الحياه اننا واحنا صغيرين , أو قبل منخش فى موضوع معين بنحكم عليه بمنتهى المثاليه .. اما لما بنبقى متورطين فيه أو بمعنى أخر
    Involved

    بنبدأ نتصرف زى الناس كلها ما بتتصرف

    وهى دى طبائع الاشياء

    دى زيارتى الاولى لمدونتك .. بس ان شاء الله مش هتكون الاخيره

    تحياتى

  8. احنا بشر
    بننجح ونفشل
    بنصيب ونخطىء
    جوانا الخير وجوانا الشر
    يعنى مثلا ممكن زعيم عصابة وقتال قتلة يبقى فى منتهى الكرم واللطف مع مراته وولاده
    وممكن برضه امام جامع يبقى بيضرب مراته كل يوم او بنصب على الناس

    هم دول البشر اللى احنا منهم
    المثالية مش من صفات البشر يا كوكو

    احنا مش ملايكة عشان نبقى بنغلط على طول
    ولا احنا شياطين والشر مالينا للأبد

    اغلطى .. اغلطى مرة واتنين وتلاتة
    عشان تحسى انك بشر

    اعملى الصح مرة والغلط مرات وافرحى لما تغلطى عشان تتعلمى لازم تغلطى

    وبالنسبة لنقد للآخرين وتصرفاتهم .. خليكى فاكرة دايما انهم بشر .. ولما تشوفى حد بيغلط او مش مثالى فى شغله او .. او .. او .. قولى لنفسك دايما “بتحصل” يعنى كل شىء وارد انه يحصل وكل تصرف غلط حصل من ناس قبل وبعد ما نتولد

    ودايما قولى للناس اللى بتنقد الآخر .. “يمكن لو اتحطيتوا فى نفس المواقف تعملوا نفس التصرفات”

    محدش بيعرف دة غير متأخر .. صدقينى .. ياما انتقدت ناس ولما وقعت فى نفس المواقف اتصرفت زيهم واوحش

    والدنيا هتعلمك دة لوحدها وهتفتكرينى

    شكرا لزيارتك مدونتى

  9. koko كتب:

    محمد حمدى

    اهلا و سهلا بيك .. اشكرك على كلماتك الرقيقة .. انت عندك حق اننا بنحكم على الاشياء من بعيد بمثالية .. بس برضة الفشل وحش يا محمد يا اخويا و خاصة مع واحدة زيى المقاييس عندها عالية شوية .. خلقة ربنا مش بأيدى بحب كل حاجة صح.

  10. koko كتب:

    أسووووور

    اهلا و سهلا بيكى نورتى المدونة .. تعرفى انتى جيتى فى الوقت الصح او بمعنى آخر انا قريت التعليق بتاعك فى الوقت الصح .. انا كنت محتاجه الكلمتين دول بالضبط ..

    ماشى انا هعمل بنصيحتك و اقول “بتحصل” و كل شئ وارد .. تصدقى و تأمنى بايه .. انا قعدت مع نفسى و قلت يا بنت يا كوكو و فيها ايه لما تغلطى يا بنتى عادى جدا خليكى كوول ..

    بس كل م اشوف الحاجة الى حصل فيها المشكلة الاقى نفسى توماتيكى توماتيكى بتنرفز و افضل اقول لو مش عارف ايه كان ايه .. و انتى عارفه لو تفتح عمل الشيطان ابن الابالسه ..

    بس لو اعرف ابقى كووول كده و على قلبى تكييف 🙂

    شكرا لزيارتك مدونتى

  11. على فكرة اللى حاصل معاكى ده بيحصل لناس كتير ساعات البنى ادم مننا بيوصل لمرحلة يحس فيها بعدم الجدوى يعنى ايه قيمة انه يبقى صح ومخلص فى عمله وحياته فى دنيا كلها ملخبطة بس فى ناس بترجع لنفسها وبتفهم ان لو كل واحد فينا اتمسك بجد بالصح بغض النظر عن تصرفات باقى الناس اللخبطة اللى فى الدنيا حينصلح حلها وحتبقى الدنيا جنة موضوع جميل دمتى مبدعة

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s