Archive for the ‘افكار’ Category

فيه ايه .. ايه كميه الكدب العجيبه الى بقت فى الحياه دى .. بعض الناس بتكدب زى ما بتتنفس .. عادى جدا ولا غضاضه .. تجربتى هحكيها يمكن حد يستفيد .. عايزه اشترى عربية .. عادى جدا حق مكفول لكل انسان بالذات لو بيركب 6 مواصلات كل يوم علشان يروح و يرجع من شغله .. و على ما بيدخل من باب البيت يكون مش قادر حتى يقول سلاموا عليكوا ..

يعمل ايه المواطن المهروس فى المواصلات و المتبهدل بسبب ظباط المرور الى منطورين فى كل حته وواقفين حال البلد و شلين المواصلات اكتر ماهى مشلوله .. يضحى بتحويشه عمره و الى عملها من طلعان عينه فى الشغل علشان يجيب عربيه مستعمله يروح بيها الشغل برضه .. تقريبا ماعملناش حاجه ..

المهم دورت فى الوسيط على عربيه تبدو كويسه و رحت متصله على الرقم المكتوب ..

– سلامو عليكم

+ عليكم السلام

– حضرتك عامل اعلان عن عربيه .. يا ترى حالتها ايه؟

+ العربيه شبه جديده و ممتازه جدا

– “يا فرج الله عربيه شبه جديده”  طيب هى باسم حضرتك؟

+ دى عربيه المدام

– “حلو اكيد المدام مش بتخمس و تعمل امريكانى”  يعنى انشاء الله هى هتبيع لى مباشره لو حصل نصيب؟

+ “نغمه صوته اتغيرت شويه”  فيه ورقه كده

– ورقه ؟؟

+ توكيل

– “مش مشكله توكيل توكيل” طيب مممكن اشوفها

+ اتفضلى العنوان كذا كذا

المهم اخدت اخويا و رحنا نشوف العربيه لقيناها حلوه و زى الفل و اتفقنا على السعر مع انه كان عالى شويه بس على كلامه انها عربيه زى الفل و مش محتاجه حاجه خالص و هو مظبطها و تمام التمام .. و كمان جربنا العربيه و مشيها زى الفل .. و فاضل بس الميكانيكى يشوفها و يقول كلمته ..

لغايه هنا مافيش اى مشاكل و الدنيا حلوه و زى الفل و الراجل آخر ادب و يوحى بالثقه .. نبتدى بقى موسوعه الكدب التى لا تنتهى ..

اولا:

سألت على توكيل العربيه على اعتبار انها باسم مراته زى ما قالى فى التليفون .. طلع فيه كلام تانى خالص عجيب .. قالى انا اشتريتها من واحد و معملتش توكيل علشان انا موظف و مش فاضى اروح الشهر العقارى “ركزوا معايا فى الحته دى علشان جايه بعدين” .. و الراجل الى اشتريت منه ظريف جدا و قالى انه اى وقت احب ابيع العربيه هيجى يعمل توكيل للى هيشترى .. “هممم طيب مش مشكله شكله سمسار و مش عايز يقول عادى سمسار سمسار المهم العربيه تطلع حلوه” بس ليه الكذب؟

ثانيا:

اخويا لاحظ وجود زيت تحت العربيه .. فسأل قاله لا ده مش من العربيه دى يمكن من عربيه تانيه كانت راكنه هنا .. ممكن برضه .. طيب عايزين ناخد العربيه للميكانيكى و الراجل الى احنا نعرفه بعيد جدا بس مش بنثق فى حد غير فيه .. المهم الراجل وافق و قالنا اخوه هيجيب العربيه و يجى معانا تانى يوم للميكانيكى ..

و فعلا جه اخوه تانى و رحنا للميكانيكى .. كشف على العربيه و قالنا عايزه تغير 3 مساعدين و بترشح زيت من الموتور و الجير بوكس .. يا حلاوه ادى العربيه الى زى الفل و مافيهاش اى حاجه .. المهم الراجل كان محترم معانا و قالنا اتصلوا باخويا خدوا نمره بتاع قطع الغيار و نعرف تمن الحاجه دى كام و نخصمهم .. اخوه مارضيش يقولنا و قعد يحور .. المهم الراجل نزل 500 جنيه من سعر العربيه .. و الى عرفته بعد ما روحت و سألت بالتليفون عن الاسعار ان قطع الغيار هتتكلف اكتر من الف جنيه ده غير المصنعيه ..

قلت يا بت مش قضيه اى عربيه مستعمله لازم تتظبط فى الاول و العربيه دى نوعها كويس يعنى لو ظبطها هتعيش معايا فتره كويسه و مش هتتعبنى .. بس الى تعبنى الكدب .. بيجيبلى ارتكاريا .. و اديت الراجل عربون على اساس نخلص بكره و يجيبلى شهاده مخالفات بتاريخ اليوم و اروح معاه الشهر العقارى هو والراجل الى التوكيل باسمه علشان نخلص ..

قعد يقولى طب و انتى تيجى الشهر العقارى ليه مش لازم تيجى ادينى البينات بتاعتك و احنا نخلصلك الورق “خد بالك انا دلوقت مش لازم اروح الشهر العقارى و اخوه كان بيقولى انا معملتش توكيل باسمى اصلى مش فاضى اروح الشهر العقارى” .. تقريبا انا باين عليا انى هبله علشان كميه الاستعباط الى بيستعبوطها عليا ..

قلتله لا يا سيدى انا احب اروح معاه و هو بيعمل التوكيل .. بس هو يجيبلى شهاده مخالفات بتاريخ اليوم علشان ننجز .. راح مكلم صاحب العربيه قاله شهاده المخالفات عملها بقالها 4 ايام .. قلت مش مشكله ماشى و لو انه فيه مخالفات بتعدى الالف جنيه دلوقت ..

المهم جبت تحويشه عمرى و استلفت عليها من امى علشان اكمل تمن العربيه و رحنا تانى يوم نجيب العربيه .. الراجل اختار شهر عقارى فى احدى النوادى الكبرى .. قلت طيب هتفرق معانا ايه؟ بعد ما دخلنا ادانى شهاده المخالفات لقيت تاريخها من اكتر من شهر .. ان ان ان .. هى سلسله الكدب مش هتنتهى ولا ايه .. و الاحلى بقى لقيت الراجل معاه ورقتين .. قولت له هى العربيه دى توكيل واحد ولا اتنين .. قالى واحد بس ..  قولت له امالى ايه التانى ده .. قالى اصل صاحبه العربيه سافرت و عملت توكيل عام لباباها و دى صوره من التوكيل … “افففففففففف .. انا مش طايقه نفسى بجد” .. هو كل شويه يطلعلى حاجه ..

مش عارفه اعمل ايه بصراحه .. البيعه دى مش مريحه خالص .. قلت خلاص انا آخر كلام هتأكد من الراجل بتاع الشهر العقارى ان كل الورق ده سليم و ان ممكن اسجل لنفسى بيه فى اى وقت .. لو قالى كله تمام يبقى خلاص .. خاصه ان الراجل ده كان محنتف و مش بيعدى اى ورقه بالساهل .. و لجل الحظ العجيب يطلع ده مدير المكتب و ان الموظفين الاثنين غايبين و هو بيعمل شغلهم .. و طبعا الدنيا زحمه .. و بعد حوالى نص ساعه كده لقيت الراجل الى كان معايا خد بعضه و مشى .. و لقيت اخويا بيكلمنى “هو كان بره النادى طبعا” بيقولى الراجل مشى ؟؟؟؟؟؟؟؟

مشى ؟؟ سابنى جوه و مشى ؟؟ ليه فيه ايه ؟؟ قالى اصله عنده شغل و هيجى يعمل لنا التوكيل بعد الظهر .. نعم يا روح “تييييت” طب و احنا ايه ان شاء الله .. ده انا واخده اجازه و مسيبه اخويا شغله و جايين من اخر الدنيا .. ده ايه القرف ده .. انا اتنرفزت و عايزه امشى ..

المهم بصيت فى الورق لقيت الراجل صاحب التوكيل مشترى العربيه من حوالى شهر نفس تاريخ شهاده المخالفات .. الله ده هو كمان سمسار بقى .. يعنى سمسار على سمسار .. و كذب و قرف .. كلمت ماما فى التليفون قالتلى الغى البيعه و تعالى الموضوع ده مش تمام .. و فعلا تم الالغاء بس صرفت مبالغ جامده فى اليومين دول .. يالله قدر الله و ما شاء فعل.

الدروس المستفاده

1- اذا اردت شراء عربيه تأكد اولا انك بتشتريها من صاحبها و ان العربيه بأسمه قبل ماتنزل من باب بيتك

2- مايغركش شكل العربيه ولا مشيها الناعم .. افحصها و افعصها اذا استلزم الامر

3- اولا و اخيرا الزم الاستخاره و ربنا ان شاء الله هييسر لك الخير و يبعد عنك الشر “بطريقته الخاصه” سبحانه و تعالى .. والحمدلله على كل شيئ

عايزه ايه

Posted: أكتوبر 30, 2009 in افكار

و بعدين  ..  كل سعاده ثبت انها وهم .. الى حبيته زمان مش طايقاه دلوقت .. و الى احترمته زمان عرفت انه اى كلام .. عايزه ايه ؟ .. ايه الحلم؟ .. ايه المطلوب ؟ .. لسه ماعنديش زوج و اولاد .. بس نفرض انه بقى عندى .. هبقى عايزه ايه بعد كده .. انى اربى ولادى .. يعنى الامل ان الواحد يجيب عيال و يربيهم و خلاص على كده .. طب و الى مش بيخلف اصلا .. يبقى ايه لازمته ..

ليه مش بنعرف نعيش لنفسنا .. ايه الاحلام ؟ .. شغل .. نجاح .. فلوس .. نعمل بيها ايه؟ .. نجيب فيلا و عربيه و نسافر و بتاع .. همممم ماليش فى الليله دى .. مش بتفرق معايا .. حياتى معقوله لم افتقد شيئ او اشعر بالحرمان من شيئ .. لذلك فامتلاك الاشياء لا يعنى لى الكثير .. ظريف و لطيف بس مش هدف ..

اتخيل دائما ان السعاده مع الشريك .. و لكن اين هو؟ ..  كان هناك شريك قديما و كنت اسعد معه حقا .. كانت الحياه ورديه جميله سعيده مطمئنه .. مع الوقت ثبت انها احلامى و اوهامى بنيتها فى خيالى و صدقتها و عشت بها .. بقليل من العقل وجدت انه ماينفعش خالص مالص .. مايساويش بصله ..

خيبتى اويه .. اصدق الكلمات الجميله .. و تأسرنى الشخصيه المرحه .. غباء .. ليست هذه هى الصفات التى نختار على اساسها الشريك .. ما حيلتى فى اننى غبيه .. نضجت كثيرا .. لم تعد الكلمات الجميله كافيه للاستيلاء على قلبى .. و الشخصيه المرحه ادقق بها و اتعامل معها بعقل فلا اجد ميزه اخرى بها ..

فأين الحلم .. لا احلم بأننى غينه جد .. و لا يهمنى .. لا احلم بأن اكون صاحبه عمل كبير .. لا يغرينى ولست موهوبه فيه .. كسولة انا .. اكونش مكسله احلم .. ممله ممله .. انا ممله .. مش عايزه حاجه.

حد فكر يقرأ التوراه

Posted: ديسمبر 14, 2008 in افكار

حد فكر يقرأ التوراه .. طبعا لأ .. و هنقراها ليه يعنى .. نقراها علشان فيها بلاوى متلتله .. و احنا زى الخايبين مضيعين و قتنا و جهدنا فى تحسين صوره الاسلام و الرد على الشبهات الى المفروض انها تسئ الى الاسلام ..

والله ده شئ عجيب اوى .. هى الناس دى ماقرتش الكتاب المقدس بتاعهم قبل ما تتكلم .. ده انا لو مكانهم كنت ضربت نفسى بالرصاص او شفتلى اى حته ادفن نفسى فيها من كتر كسوفى و خجلى من الحاجات الى مذكوره فى كتاب المفروض انه مقدس .. مش اجى على اطهر و اقدس كتاب فى الارض و افترى عليه .. بس نقول ايه .. الناس دى عارفه اننا شعوب جاهله و سهل جدا استدراجنا ..

دول المفروض يحمدوا ربنا و يبوسوا ايديهم وش و ضهر ان القرآن الكريم ده موجود علشان ينصف الانبياء و يذكر قصصهم الحقيقية الطاهره بعيدا عن النجسات الى ذكروها عن كل الانبياء بدون استثناء ..

تخيل معايا يا مؤمن ان كل الانبياء فى التوراه “المفتراه” بيسكروا و يزنوا و ينصبوا و يسرقوا .. لا و خد التقيله بيعبدوا الاصنام .. اعوذ بالله و حاشا لله ان الانبياء المطهرين يكونوا كده ..

بصراحه لازم كلنا نقرا التوراه علشان الى يفتح بوءه معانا نحطها فى عينه و نعرفه مقامه .. دا احنا راقيين اوى يا جدعان و القرآن ده نعمه رهيبه و احنا مش حاسين .. انا كنت زى الاموره بقول احترام الاديان و الحوار وتقبل الآخر و كلها ديانات سماويه من عند ربنا .. بس فعلا هى مش كده ..

هات اى عقل سليم و قوله ان النبى الفلانى نام مع بناته و خلف منهم و هو سكران .. او نبى آخر بيزنى مع ست متجوزه و يقتل جوزها الى هو قائد فى الجيش عنده .. و نبى تالت فضل يشرب لحد ما سكر طينه و قلع ملط .. و نبى آخر عمل عمليه نصب و احتيال علشان ياخد اغنام بتاعه عمه الى كان بيشتغل عنده ..

انا اسفه بصراحه على الالفاظ و الوصف البشع بس الكلام ده و انيل منه الف مره مذكور فى الكتاب “المتفبرك” الى اسمه العهد القديم او التوراه و حاشا لله ان تكون هذه هى التوراه التى انزلها ربنا سبحانه و تعالى على سيدنا موسى عليه السلام .. بجد بجد هما فين و احنا فين .. الحمدلله على نعمه الاسلام .. بس السؤال الى محيرنى فعلا ازاى الناس دى مؤمنه بالكلام البشع ده .. مش فاهمه

سن ال 24

Posted: أبريل 6, 2008 in افكار
الوسوم:

اجمل سن هو سن ال 24 بتكون فيه فى اجمل و احسن حالاتك .. بمعنى ان صحتك بتبقى حلوة و تمام .. مش زى لما كنت صغير و ضعيف او بتربى عضلات و بتكون خلاص دقنك و شنبك طلعوا و بقى شكلهم حلو .. و فى نفس الوقت بيكون لسه بدرى عليك من الشكاوى بتاعة ضهرى و جعنى من الشغل و رقبتى مش عارف ايه و ركبتى لخلخت و عينيه زغللت و الكلام الى بيحس بيه الناس بعد الثلاثين من كتر الشغل و قله الرياضه و الحركة ..

و نفس الشئ بالنسبة للبنت بيكون السن ده اجمل سن ليها .. يعنى بتكون بقت انثى مكتمله .. مش عبيطة و هطله زى ايام ثانوى او مرووشه و مجنونة زى ايام الجامعه .. لا بتبقى حاجه كده وسط و روقان ..

كمان على مستوى الشخصية .. العمر ده بتكون الشخصية اتكونت بشكل جميل اوى .. يعنى حماس و علم و ثقافه و رغبه فى التقدم و اثبات الذات .. لكن مع شوية خبرة صغيرين يخلوا الواحد عاقل الى حد ما .. لأن خد بالك ان كل ما الخبرة زادت كل ما الحماس قل لأنك بتبقى حريص جدا فى كل تصرفاتك و ده بيضيع كتير من متعة المغامرة و الامل فى المستقبل ..

فى سن ال 24 بيبقى الولد عايز يثبت نفسه فى شغله و يبقى حاجه مهمه و البنت بتكون عايزة نفس الشئ بس كمان بيبقى نفسها تتجوز و تكون اسرة و بيكون عندها احلام و امال رومانسية كتير اوى .. و بتكون مستعده للتضحيه و الكفاح علشان الى بتحبه .. ده طبعا لما يكون فيه منه رجا .. مش قاعد جنب ماما و عايز يشتغل مدير يا اما بلاش ..

فى سن ال 24 بتكون الحياه حلوه و الامل كبير و المشاعر دافيه .. بس يا ترى بنقدر نعمل ايه فى السن دى ؟؟؟

البنت علشان تتجوز فى السن دى يا دوب تاخد واحد اكبر منها بعشره اتناشر سنة و على فكره هيكون برضه لسه بيكون نفسه يعنى مش امله ولا حاجه .. يا اما تخليها فى شغلها و مستقبلها المهنى و ده بيحقق لها استقلال مادى و راحه نفسية بس فى مقابل انها بتفتقد الزوج و الاولاد.

و الولد لو حظه حلو هتجيله سفريه لأى دوله عربيه او اجنبيه .. يشتغل و يتغرب اد سبع تمن سنين على يا دوب ما يقدر يقول يا جواز و لو حب يرجع بلده مايلاقيش الشغلانه الى تعيشه فى مستوى كويس فيفضل بره على طول .. اما لو فضل فى مصر مش عارفه بصراحه هيعمل ايه فى الغلى و الكوى الى احنا فيه ..

و فى ظل كل ده مشاعرنا بتروح فين و شبابنا و صحتنا و عمرنا الجميل .. و جمالنا .. و براءة النظرة فى عينينا .. و احساسنا بالأمان و الامل .. بس هنقول ايه .. لآ اله الا الله .. يعنى هو ربنا مش شايف و عارف كل حاجه .. و الى خلقنا مش ممكن ينسانا ابدا .. المهم احنا الى ماننساش .. و نثق فيما عند الله .. و نثق ايضا ان الرزق مقدر تماما .. يعنى مهما حصل و هيحصل مش ممكن ابدا يوصل لنا الا رزقنا المقدر لنا .. مهما كانت مخاوفنا و مهما كانت ايامنا .. يا رب الفرج من عندك و الشكر لك و الحمدلك.

شيله و حطه

Posted: مارس 24, 2008 in افكار

الحياة بقت ممله .. او هيا اصلا ممله مش عارفه .. ايه الحكمة من ان لازم يكون فيه حاجه فى الحياه تخنقك .. شئ او شخص .. و العجيب انك ممكن اوى تكون فى حالك خالص و مش بتأذى حد و مش بتضايق حد و لا بتجر شكل حد .. بس هو كده غتاته و خلاص .. المضايقات تجيلك لحد عقر دارك يا جدع و بدون اى مناسبة ..

بس العجيب فى الموضوع ان برضه السعادة و الفرح بيجولك لحد عقر دارك من غير ما تنتظرهم و لا تعمل حسابهم .. حياه عجيبة و متعبة عامله زى القطر الافعوانى بتاع الملاهى يوم تشيلك و تطلعك فوووق و يوم تهبدك على ملا وشك .. و يوم تقعد تهز فيك و تبقى روحك هتطلع و مش عارف لك سما من ارض.

قدامك حاجة من اتنين يا تاخد على كده و تعرف ان ده العادى و فى الحاله دى هتصاب بشى من تبلد الاحساس يا تتعب و تدوب من كتر الشيل و الحط و تحس انك بجد تعبت بقى و مش حمل بهدله اكتر من كده.

العلم و سنينه

Posted: فبراير 6, 2008 in افكار

هيجيلى شلل فى نافوخى .. بعد الشر بعد الشر .. بس بجد مش عارفة اظبط الدنيا .. اختراع كده اسمه css ده بيستعمل فى تنفيذ صفحات المواقع دلوقت .. زمان كنا بنشتغل tables و اقلب التصميم يا معلم .. دلوقت روحى طلعت علشان اواكب العصر الحديث و برضه مش مرتاحه ..

المهم ده كلام تقنى مش هيفهمه الا ولاد الكار .. بس الحقيقة هو مدخل للموضوع الى عايزه اطرحه .. انا اتعلمت تصميم المواقع مع نفسى يعنى من الكتب و النت و دراسة المواقع الكبيرة و الحمدلله النت مصدر مفتوح يعنى تقدر تعرف اى موقع فى الدنيا معمول ازاى و تعمل زيه ..

طب دى حاجه فله اوى ايه المشكلة بقى .. المشكلة يا سيدى انك بتتعلم بالمشقلب يعنى مثلا انت عايز تعمل عربية تقوم تجيب عربية جاهزة و تفكها حتت .. و تقعد تدرس كل حته معموله ازاى و وظيفتها ايه و بتتركب على اختها ازاى و لا يخفى على ذكاءك طبعا انها مش هتشتغل من اول مرة و لا حتى عاشر مرة و هتقابلك مشاكل كتيييييير تقعد تدور على حل لكل مشكلة .. و بعدين تبص تلاقى انك جيت تقصر البنطلون الجاكتة ضربت على رأى سمير غانم.

و كل ده ليه علشان مافيش منهج ومافيش مكان محترم تتعلم فيه ومافيش تدريب فى الشركات و مهما حاولت تذاكر مع نفسك و تقرأ كتب و تدور على النت برضة مش هتلاقى الزبد يا معلم .. لابد من فك العربية .. واحد طيب و ابن حلال يقولى ليه ماهو فيه اماكن بتعلم الويب ديزين اقوله .. فعلا فيه بس حاجات بيزيك اوى اساسيات يعنى و برضه من ايام تحتمس ..

انا بس الى قاهرنى ان الواحد بعد ما داق المر و سهر الليالى علشان يعرف يعمل العربية و بقى اسطى بريمو اد الدنيا .. ولاد الايه غيروا التكنيك خالص و رجعنا الى نقطة البداية .. بجد حاجة تفرس يعنى احنا عمالين نجرى علشان بس نلحق التكنولوجيا و نتعلمها و الشباب فى البلاد المتقدمة عماله تخترع و تحدث فى كل شئ .. بجد بجد احنا عايزين نتعلم نتعلم نتعلم .. ناقصنا علم يا ناس.