هيجيلى شلل فى نافوخى .. بعد الشر بعد الشر .. بس بجد مش عارفة اظبط الدنيا .. اختراع كده اسمه css ده بيستعمل فى تنفيذ صفحات المواقع دلوقت .. زمان كنا بنشتغل tables و اقلب التصميم يا معلم .. دلوقت روحى طلعت علشان اواكب العصر الحديث و برضه مش مرتاحه ..
المهم ده كلام تقنى مش هيفهمه الا ولاد الكار .. بس الحقيقة هو مدخل للموضوع الى عايزه اطرحه .. انا اتعلمت تصميم المواقع مع نفسى يعنى من الكتب و النت و دراسة المواقع الكبيرة و الحمدلله النت مصدر مفتوح يعنى تقدر تعرف اى موقع فى الدنيا معمول ازاى و تعمل زيه ..
طب دى حاجه فله اوى ايه المشكلة بقى .. المشكلة يا سيدى انك بتتعلم بالمشقلب يعنى مثلا انت عايز تعمل عربية تقوم تجيب عربية جاهزة و تفكها حتت .. و تقعد تدرس كل حته معموله ازاى و وظيفتها ايه و بتتركب على اختها ازاى و لا يخفى على ذكاءك طبعا انها مش هتشتغل من اول مرة و لا حتى عاشر مرة و هتقابلك مشاكل كتيييييير تقعد تدور على حل لكل مشكلة .. و بعدين تبص تلاقى انك جيت تقصر البنطلون الجاكتة ضربت على رأى سمير غانم.
و كل ده ليه علشان مافيش منهج ومافيش مكان محترم تتعلم فيه ومافيش تدريب فى الشركات و مهما حاولت تذاكر مع نفسك و تقرأ كتب و تدور على النت برضة مش هتلاقى الزبد يا معلم .. لابد من فك العربية .. واحد طيب و ابن حلال يقولى ليه ماهو فيه اماكن بتعلم الويب ديزين اقوله .. فعلا فيه بس حاجات بيزيك اوى اساسيات يعنى و برضه من ايام تحتمس ..
انا بس الى قاهرنى ان الواحد بعد ما داق المر و سهر الليالى علشان يعرف يعمل العربية و بقى اسطى بريمو اد الدنيا .. ولاد الايه غيروا التكنيك خالص و رجعنا الى نقطة البداية .. بجد حاجة تفرس يعنى احنا عمالين نجرى علشان بس نلحق التكنولوجيا و نتعلمها و الشباب فى البلاد المتقدمة عماله تخترع و تحدث فى كل شئ .. بجد بجد احنا عايزين نتعلم نتعلم نتعلم .. ناقصنا علم يا ناس.
ربنا يوفقك يا رب وإن شاء الله هتبقى فى النظام الجديد أحسن من القديم
وأهو كله بيتطور بس متهيأ لى ان النطاو الجديد اللى انتى بتقولى عليه أكيد ليه مميزات أكتر من القديم
ربنا يوفقك ويكرمك يا رب
شكرا على زيارتك يا محمد و على كلماتك الرقيقة .. فعلا النظام الجديد له مميزات كتير بس شغله معقد .. ربنا يكرمنا كلنا يا رب.
عارفة..الحل الوحيد انك تخترعي نظام جديد..وبالتالي هيكونوا هما اللي عايزين يتعلموه
😀
ربنا يوفقك..والى الامام دائما
تحياتي
اهلا و سهلا مارفل نورت المدونة .. انت جيت على الجرح و اتكيت .. احنا فى مجال تكنولوجيا المعلومات بنحاول و الله جاهدين و فيه ناس دماغها حلوه بس الاساس .. العلم .. الى احنا بنعانى علشان نوصل له .. و بياخد وقت و جهد كبير اوى لأنه كله اجتهادات ذاتيه و الى حظه حلو بيلاقى الى يعلمه .. ربنا كبير و لكل مجتهد نصيب.
حلو اوي الكلام وبالظبط زى ما قلتي مفيش مكان محترم فى مصر ينفع ناخد فيه ويب ديفولبينج ما تتفضلي علينا بقي وتشرحلنا نبدأ ازاى اصلي بعيد عنك فى حاسبات وعايز اكمل ويب ديفولبر بس بجد مش عارف ابدأ ( مكسل الصراحة ) ومستني الخطوة الاولي ولحد دلوقتى مش عارف اخدها عرفيني بقي بعد إذنك 😀
تحياتى
تشي
انتي بتتكلمي في مشكله للاسف مش هتحل غير يجي بعد عشرين سنه
استخدام الانترنت عندنا في مصر للاسف بقى منحصر في تلات حاجت
اول حاجه هي الشات .. والولاد بيشيتو عشان يتعرفو على بنات .. ودي معروفه ودول اكبر نسبة مستخدمين للانترنت
تاني حاجه .. داونلوود اغاني وافلام وجيمز .. وده بيحصل في كل العالم لكن في مصر بشكل كبير قوي ومبالغ فيه .. خصوصا الافلام البورنو والاغاني
تالت حاجه .. العالم اللي عايزين يوسعو مداركهم وينمو قدراتهم زيك عن طريق انهم يتعلمو بنفسهم او يتصفحو الانترنت لاستخدامات زي البلوجينج او الاشتراك في منتديات .. ودول للاسف قلة .. وتقدري تقولي قله مندسه لاني لما بقول لاي شخص اني عامل بلوج او مدونه يقولي وايه دي .. بتجيب حريم يعني ولا لأ
!!!!!!!!
سعيد اني اخيرا عترت على المدونه بتاعتك
سلامووووووووووووووووز
تشى
اهلا و سهلت نورت المدونة .. شوف يا سيدى احدث حاجه دلوقت تقنيه اسمها
AJAX
اعمل بحث عنها و هتلاقى بلاوى متلتله تقدر تبدأو احده واحده .. بس مش غريبة انك فى حاسبات و بتسأل .. امال بتدرسوا ايه فى الاربع او الخمس سنين بتوع الدراسه .. هو ده بالضبط الى انا بتكلم عنه الدراسه فى مصر تضييع و قت و فلوس و لما تحب تشتغل تدور على حاجه تتعلمها .. ماحدش عنده حل .. بتكلم جد .. حل عملى.
سوووو يا سوووو
كلمة السر “اربع دواير يعنى اودى و سين يعنى سعودى” .. عاجبانى اوى مش قادره انساها .. نورت يا باشا المدونه .. و اشكرك على المعلومات الهائلة دى .. يعنى دوقت النت بقى مشبوه و بيجيب حريم .. ياللعار .. الحمدلله اننا من القله المندسه ربنا يخلينا لبعض و نزود عدد المندسين ..
عارف يا سوووو انا لما عترت على الجماعه المدونين دول نفسيتى ارتاحت اوى .. كنت حاسه الدنيا سواد و الناس اغبيه و متخلفين رغم انى و الله العظيم متفائله .. بس بجد فرحت اوى بالعقول النضيفه و القلوب الى لسه بتحس و تنبض
كلام سوووووو مظبوط
احنا اقليه في المجتمع و انا بصراحه متالم جدا بسبب جهلي بتصميم المواقع و الكتب فعلا مش كفايه
لازم مراكز تدريب متطوره
و تحديث مستمر لنوعيات برامجها
ذو النون المصرى
اهلا و سهلا نورت المدونه .. كلامك صح المطلوب مراكز تدريب متطوره و تحديث دائم للبرامج بس مين الى هيشتغل فيها و هيتعلم فين الأول و هيحدث نفسه ازاى .. فاكر زمان ايام رفاعه الطهطاوى و طه حسين و البعثات الى كانت مصر بتبعتها لاوروبا .. ناس تسافر تتعلم من الآخر و تيجى تعلم غيرها .. اعتقد ده الى احنا محتاجين له.
و الله ف دكتور جميل اوى عندنا ف الكلية هو رئيس قسم الفيروسات (بيطرى القاهرة ) قالنا مرة حاجة جميلة اوى ان احنا بنتعلم او عايزين نتعلن _القشط_ يعنى وش الحاجة بس زى الوجبات السريعة ع كدة هما برة حاجة تانية
البريزة ليها وشين ملك و كتابة
لاسف هما الملك و الكتابة
واحنا ولا حاجة
تحياتى يا افندم
كفراوى
اهلا و سهلا نورت المدونه .. طب ليه يا دكتور يا جميل الاحباط ده .. هما كل حاجه و احنا ولا حاجه .. مش صحيح ان شاء الله .. هم فعلا عندهم العلم الى من جوه الى فى الاعماق و احنا برضه ممكن نوصل له بس هنحتاج مجهود مضاعف ثلاث مرات .. ربنا معانا جميعا.
سلامو عليكو
ماكنش حقك تقعدي تكتبي التدوينة دي
زمانهم اخترعو سيستم جديد
🙂
ربنا معاكي .. و العلم حلو .. و بيدي للواحد شعور ان له لزمة
و بعدين “من سلك طريقا يلتمس فيه علم ” أكيد عرفه الحديث
ربنا معاكي .. و تحياتي لمدونتك الحية (فيها روح حلوة يعني)
مصطفي
مصطفى محمود
اهلا و سهلا بيك نورت المدونه .. تصدق عنك حق الواحد الواحد مش لاحق .. يالله ربنا يعينا جميعا و ييفتح لنا طرق العلم
والنبي بلاش حكاية انى فى حاسبات وبسأل دي علشان انا اتشليت من الكلية مرة بسأل معيد هو احنا مش هناخد ويب ديفلوبمينت قالى لا مفيش فى اى تخصص فى الاربع سنين
كنت عايز اعيط يومها
احنا بناخد مبادئ إدارة وبناخد مواد تجارة وانجليزي واقتصاد واحصاء وحاجة تفقع المرارة ربنا ما يوريكي
انا قربت اتشل وسوق العمل مش هيقبل منا حد لاننا ما بندرس حاجة تمت ليه بصله ومش نافعين ولازم كل واحد يشتغل مع نفسه وياخد كورسات برا الكلية فى الحاجة اللى عايز يكمل فيها او يبدأ مع نفسه علشان ينفع
انا بكره الكلية
تحياتى كتير
تشي
لفت نظرى عدة نقاط ارى انه من المهم ان اشير اليها ربما تكون مفيدة
اولا
احب ان الفت نظرك ان جميع برامج التصميمات تحتاج لاتقانها الى معرفة كيفية التشغيل من ناحية والتمرين على التكنيكات المختلفه من ناحية اخرى
برنامج مثل autocad او photoshop مثلا لديهم وظائف كثيره لرسم دوائر وخطوط مستقيمه ومنحنيات الخ وبعد معرفة هذه الامكانيات يجب التمرين على كيفيه استخدام هذه الادوات لرسم اشياء مركبة ومعقده مثل غرفه سفره او تكوين هندسى او تكوين زخرفى الخ
وهذه بالاضافه الى موهبة المصمم هى الاساس فى التفوق وبجانبها يكون اتقان تشغبل البرنامج هو اسهل المراحل
لهذا اعتقد ان تحميل مواقع ودراسة كود ال html لن يؤدى الى نتيجة مبهره ولن يؤدى غالبا الى استنتاج التكنيك الذى اتبعه المصمم للوصول للشكل النهائى الا اذا كانت الصفحة بسيطه
ثانيا
لاحظت انك تتكلمين عن الجزء الاستاتيكى من الموقع وهو شكل الصفحة النهائيه التى يراها المتصفح وهى فى النهاية مجرد كود html بسيط
ولكن هذا جزء صغير اهميته فقط فى المواقع التى لا غرض لها سوى نشر بيانات استاتيكية عن صاحبها ولكن هناك الجزء الاكبر من الموضوع وهو الجوء الذى يعمل على السيرفر فى المواقع الديناميكية وهو جزء اكبر واهم بكثير وهو جزء برمجى بحت منفصل عن التصميم والنواحى الجمالية وتحتاجين لكتابته الى لغه برمجه ومتوفر منها انواع منها لغات الاسكريبت مثل asp و php الخ او حتى لغات برامج الdesktop المشهورة والتى يمكن استخدامها ايضا من خلال تكوين exe او dll وباستخدام اسلوب الcgi
ثالثا
موضوع ال css موضوع بسيط جدا
هو فى الحقيقه مجرد انشاء توصيفات مجمعه واعطائها اسم واستخدامها فى الصفحه وغرضه الاختصار وعدم التكرار من ناحية واستخدامه فى كل الصفحات او فى عدد من المواقع من ناحية اخرى بالاضافه الى انه يضمن ثبات شكل الصفحة فى حالة تفيير المستخدم الـ text size من قائمة المتصفح
تشى
اهلا بيك مرة تانية .. ما تزعلش يا سيدى مش هقولك انت فى حاسبات و لا حاجة و لو عايز منى اى مساعدة انا تحت امرك .. بس اخبار اللغة عندك ايه؟ لو قوية يبقى مافيش مشكلة ان شاء الله و ممكن تتعلم كويس جدا من النت بس هتبذل مجهود ووقت كتير .. اما لو ضعيفة انصحك بداية تاخد كورسات انجليزى فى مكان محترم زى الامريكان او البريتش .. هيكلفك شوية انما هتتعلم صح.
هارملس
اهلا و سهلا بيك نورت المدونة .. اشكرك على اهتمامك و رغبتك فى المساعدة و انك بذلت جزء من وقتك لكتابة هذا التعليق الطويل لإفادتى .. جزاك الله خير .. و انا ان شاء الله مش هكون اقل كرما منك لأفادة الناس الى ممكن تعدى على المدونه.
برامج التصميمات تقسم الى صنفين اساسيين الاول برامج الرسم مثل الاوتوكاد و ده للتصميم الهندسى و يقارن بالكورل درو و الاليستراتور للتصميم الفنى اما القسم الثانى فهو برامج photo editing مثل الفوتوشوب و جيمب.
اول خطوة فى عمل التصميم هى طبعا استخدام هذه البرامج او ما يشبهها و الاساس طبعا هو الموهبة ثم اتقان استخدام ادوات كل برنامج.
الخطوة التانية هى تنفيذ التصميم و دلوقت فيه xhtml و ده احدث من html و كمان css الى بنعتمد عليه بشكل مكثف جدا و له تقنيات معقدة للغاية اما استخدامه فى عمل توصيفات مجمعه فدى وظيفته القديمة جدا و الهامه فى نفس الوقت.. و دى من اعقد المراحل و ادقها و هى الى بيتوقف عليها بناء الموقع ككل .. و لها تقنيات مافيش حد هيعلمهالك اصلا علشان كده بتفتح الكود بتاع المواقع الكبيرة و تتعلم منه ..
حاجة تانية مهمة فيه خلط بين المصمم و المطور .. المصمم هو الى بيعمل الحاجات الى فوق دى اما المطور هو المختص بالجزء الديناميكى من العمل يعنى ياخد الصفحات جاهزة من المصمم و يقوم بتركيبها و تشغيلها .. وممكن يستخدم php او asp بس دلوقت فيه حاجه احدث بكتير اسمها ajax
يارب اكون افدت حد.
إحم
مين ده اللي بتتكلمي عنه ده؟ يعني ممكن نوصل عليه أنبوبة البوتاجاز على طول وألا هنحتاج منظم؟
ههههه
أنا بقى بدأت الكومبيوتر من قبل ال إكس تي كمان .. أيام الكومبيوتر أبو مانفللة
فين جديدك يا كوكو
مختفيه ليه
لعل المانع خير ان شاء الله
سلامووووووووووووز
فُطـــع العلم وسنينه يا اختااااااه 🙂
انتي عارفة ماحدش بيدي كورسات متخصصة ليه , علشان المتخصصين في البلد ديه اصلا مش متمكنين , وكلهم رافعين شعار self study
وانتى عارفة ال self study ده يشل و يعل ويا عالم اللي فهمتيه صح ولا غلط .. الي الامام ولو احتجتى اي حاجة في ال field الملعون ده نحن هنااااا 🙂
ســــــلام
وفقك الله لما يحبه ويرضاه
اجتهدى ولا تحملى نفسك أكثر من وسعها
واسستعينى بالله وإن شاء الله الأمور كلها تتيسر
اتمنى لك كل التوفيق والنجاح والسعادة فى الدنيا والآخرة
انا فعلا عايز اتعلم من ع النت او كتب يعني واللغة الحمد لله عندي كويسة ( وبردو عايز اخد كورسات بس علشان اظبط النطق وكدا ) لو فى مواقع تعرفيها تفيد بليز اديهاني
وكمان حاجة بقي احنا كنا عايزين حد يعمل موقع لمجلة بنعملها
وانا مدير تحرير المجلة لو مهتمة بالموضوع دا ميليhima.jevara@yahoo.com
تحياتى كتير
تشي
يا مراكبى .. امة الله .. شهر زاد
اهلا و سهلا بكم فى مدونتى المتواضعة .. نورتم و اسفه على التأخير فى الرد .. انا كنت مخطوفه فى الشغل و بيعذبونى .. حتى اهلى مش بشوفهم غير سلامو عليكم عليكم السلام .. معلش هيه زنقه و تعدى ان شاء الله.
اهلا يا بنت كارى
أنا ويب ديزاينر محترف على فكرة , وبرضو كنت بعانى من الى انتى بتقوليه ده .. أنا مشكلتى مش فى CSS بقدر ماهى فى لغه البرامج المتغيره , زى بى اتش بى مثلا لما تيجى تتطبقيها مع قواعد وجداول البيانات ..
كل الحاجات هتواجهيها لما تحترفى الشغل مع البرامج المفتوحه وتكتشفى انها مش هتقدملك كل حاجه , الإتجاه النهرده انك ازاى تحولى تمبلت الفوتوشوب الى انتى عاملاه الى سايت ديناميكى متغير ومتجدد من خلال كنترول بانل انتى الى عاملاها على حسب احتياج كل عميل .. هى دى كلمه السر
أنا اسف لو كان كلامى مليان مصطلحات , ياريت متعتبرينيش متعجرف او بتفذلك عليكى انا بتكلم بمصطلحات عشان عارف انى بكلم واحده من بنات كار الديزاين فا مش غريبه يعنى , و عموما أنا برحب جدا انك تكلمينى على الايميل بحيث اقولك انا وصلت لحد فين , واكيد هفيدك ومؤكد هستفاد منك لان المجال بتاعنا ده ملوش كبير
تحياتى المخلصه .
اهلا و سهلا محمد حمدى نورت المدونه .. و سلام خاص لولاد الكار الجدعان اوى
“ازاى تحولى تمبلت الفوتوشوب الى انتى عاملاه الى سايت ديناميكى متغير ومتجدد من خلال كنترول بانل انتى الى عاملاها على حسب احتياج كل عميل”
انت بتتكلم جد .. طب اثبت عندك علشان انا جايالك 🙂
أنا معك في كل كلمة … مجال الكمبيوتر دا مجال محتاج متابعة دائمة لكل جديد..
ربنا يوفقك يارب ويعينك..
من رأى ان كلو مبنى على بعضو يعنى اللى اتعلمتيه النهاردة هتحتاجيه بكرة ف التحديث لان كل حاجة بتتجدد مش بتشيل اللى قبلها من جزورها لا دى بتبنى عليها وتكمل عليها ودة ف حد زاتو ميزة انك هتقدرى تتطورى باستمرار
ربنا يوفقك يارب ويكتبلك النجاح الدائم بعد ما تتعلمى طبعا